Tusassip inuit pillugit paasissutissanut politikkia

Tusass A/S-imi atuisutut nalunaarsorneqarninnut atatillugu (matuma kingorna ”Tusass”) illit pillutit paasissutissat assigiinngitsut suliarineqassapput. Tassa imaappoq paasissutissanik illersuineq pillugu peqqussut¹ aamma Kalaallit Nunaanni inunnik paasissutissanik suliarinnittarneq pillugu inatsit² atuupput aamma paasissutissat ilinnut tunngasut qanoq suliarineqarnerannut tunngasut pillugit paasissutissinneqarnissannut Tusass pisussaaffeqarpoq. Taamaammat inuit pillugit paasissutissanut politikkimik matuminnga suliaqarpugut, tassani suliarinninnermut atatillugu siunertaq, inatsisitigut tunngavik, uninngatitsineq, ingerlatitseqqinneq pisinnaatitaaffitillu pillugit sukumiinerusumik paasisaqarnerusinnaavutit.

1.     Paasissutissanut akisussaasoq

Tusass A/S paasissutissanik ilinnut tunngasunik suliarinninnermini paasissutissanut akisussaasuuvoq.

Tusass A/S
Farip Aqqutta 8
3900 Nuuk
Grønland

CVR-nummer: 17516345

privacy@tusass.gl

Paasissutissanik illersuinermut siunnersorti:
Tusass sinnerlugu DPO Danmark, Data Protection Officer (DPO) akisussaaffeqarpoq, taannalu uunga attavigineqarsinnaavoq:

DPO-tusass@dpo-danmark.dk

2.    Nassuiaatit

“Inuit pillugit paasissutissat”: Paasissutissat tamarmik inuup kinaaneranut toqqaannartumik toqqaannanngitsumilluunniit atorneqartartut. Taakku assersuutigalugu tassaasinnaapput ateq, najugaq, IP-adressi, oqarasuaatip normua aamma sumiinneq pillugu paasissutissat.

”Suliarinninneq”: Paasissutissanik ilinnut tunngasunik suliaqarluni Tusassip paasissutissanik uninngatitsisarnera, piiaasarnera, misissueqqissaartarnera ingerlatitseqqittarneralu pineqarput.

”Paasissutissanut akisussaasoq”: Tusass paasissutissanut akisussaasuuvoq aamma paasissutissat ilinnut tunngasut qanoq suliarineqarnissaannut suullu siunertaralugit suliarineqarnissaannut tunngatillugu aalajangiisarpoq. 

3.   Inuit pillugit paasissutissat suussusaat

Tusass inuit pillugit paasissutissanik nalinginnaasunik isertuussassanillu suliaqartarpoq. Paasissutissanik suliarinninnermi inuit pillugit paasissutissani suut aamma paasissutissat sorliit suliarisarnerivut ataani paasisaqarfiginerusinnaavatit.

4.   Siunertaq aamma suliarinninnermut tunngavik

Tusassip illit pillutit paasissutissat siunertanut ukununnga atortarpai:

Paasissutissat ingerlaannartumik pissarsiarineqartut

• Atuisutut nalunaarsuineq atuisunullu tunngatillugu allaffissornikkut aqutsineq
  Inuit pillugit paasissutissat nalinginnaasut: ateq, najugaq, e-mail, oqarasuaatip normua, akiliinermi paasissutissat, atuisuuffiup suussusaa, atuineq pillugu paasissutissat.

  Inatsisitigut tunngavik: paasissutissanik illersuineq pillugu peqqussut art. 6, imm. 1, litra b (isumaqatigiissuteqarnissamut pisariaqarpoq).

  Inuit pillugit paasissutissat isertuussassat: Inuup normua

  Inatsisitigut tunngavik: Kalaallit Nunaanni inunnik paasissutissanik suliarinnittarneq pillugu inatsimmi § 11, imm. 2, nr. 2 (akuersissut)

  Siunertaq: Atuisutut nalunaarsorsinnaaniassagavit aamma siumut akiliisarnissamik isumaqatigiissuteqarfigiumalluta atuisuuffinnik allaffissornikkut aqutsisinnaanissatsinnut atatillugu Tusass paasissutissanik suliaqartarpoq. Kinaassutsimut tunngatillugu peqquserluttoqarnissaa pinaveersaarniarlugu, matumani allat aqqi atorlugit atuisutut nalunaarsortoqannginnissaa qulakkeerniarlugu inuup normui atorneqartarput.

• Inunnut 18-it ataallugit ukiulinnut atuisuuffiit
  Inuit pillugit paasissutissat nalinginnaasut: ateq, najugaq, oqarasuaatip normua, e-mailadresse

  Inatsisitigut tunngavik: paasissutissanik illersuineq pillugu peqqussut art. 6, imm. 1, litra b (isumaqatigiissuteqarnissamut pisariaqarpoq).

  Inuit pillugit paasissutissat isertuussassat: meeqqap inuttut normua, angajoqqaat/angajoqqaatut oqartussaassusillip inuttut normui

  Inatsisitigut tunngavik: Kalaallit Nunaanni inunnik paasissutissanik suliarinnittarneq pillugu inatsimmi § 11, imm. 2, nr. 2 (akuersissut)

  Siunertaq: Tusass meeqqat tallimaniit 17-it tungaanut ukiullit mobilimik atuisuuffeqarnissaannut neqerooruteqarpoq. Meeqqanut atuisuuffimmik pilersitsiumalluni meeqqap ukiui meeqqallu 18-it ataallugit ukioqarnera uppernarsarniarlugit, aamma meeqqanut atuisuuffimmut piumasaqaatit naammassiumallugit inuttut normui allanneqassapput. Angajoqqaaq angajoqqaatulluunniit oqartussaassusilik meeqqap inuttut normuinik uppernarsaassaaq meeqqallu atuisuuffianut akisussaasutut atassuserneqassalluni.

• Atuisunut sullissivik aamma supporti
  Inuit pillugit paasissutissat: Ateq, attaveqarfissaq, oqaloqatigisimasat pillugit allattorsimaffik, teknikkikkut paasissutissat.

  Inatsisitigut tunngavik: GDPR art. 6, imm. 1, litra b

  Siunertaq: Tusass pitsaanerpaamik sullissisinnaaniassagami, saaffiginnissutit akisinnaaniassagamigit, teknikkikkut ajornartorsiutinik aaqqiisinnaaniassagami ikiorneqarumallunilu qinnuiginninnerit eqqortumik malitseqartinnissaat qulakkeerniassagamigit taakkuninnga suliaqartarpoq.

• Nittarsaassineq nutaarsiassallu
  Inuit pillugit paasissutissat: Ateq, e-mail, toqqagassat.
  Inatsisitigut tunngavik: GDPR art. 6, imm. 1, litra a (akuersissut).

  Siunertaq: Nutaarsiassanik pissarsisarusukkuit tamanna piviusunngortikkumallugu inuit pillugit paasissutissat taakku atorneqartarput..

5.   Paasissutissat ingerlaannartumik pissarsiarineqartartut

• Attavinnik sullississutinillu ingerlatsineq aserfallatsaaliuinerlu
  Inuit pillugit paasissutissat nalinginnaasut: IP-adressit, MAC-adressit, teknikkikkut iserfiit pillugit paasissutissat.

  Inatsisitigut tunngavik: GDPR art. 6, imm. 1, litra f (unioqqutitsinerunngitsumik paasissutissanik atuineq)

  Siunertaq: Aalaakkaasumik ingerlatsinissaq, aserfallatsaaliuinissaq aamma Tusassip attaveqaataanik sullississutaanillu isumannaallisaanissaq kiisalu teknikkikkut ajoqutinik paasiniaasarnissaq atuisullu misigisaannik pitsanngorsaanissaq qulakkeerniarlugit Tusass taakkuninnga atuisarpoq. 

• Inatsimmik eqqortitsineq (ass. paasissutissaateqarfinnut iserneq pillugu nalunaarut)
  Inatsit: Nalunaarasuartaatitigut atassuseqarnermik akuersissut Naalakkersuisunit atuutilersinneqartoq

  Paasissutissat: Attaveqarneq sumiiffillu pillugit paasissutissat, tassunga ilanngullugit Tusassip attavia atorlugu oqarasuaatikkut sianerfigisavit normui aamma/imaluunniit allaffigisatit, oqarasuaatip normui ilinnut sianertut aamma/imaluunniit allattut, oqaloqateqarnerup sivisussusia kiisalu sianernermi nalunaaruteqarnermilu nalunaaquttap qanoq ilinera. Tamatuma saniatigut sumiinneq pillugu paasissutissat (GPS), matumani mobilnormup sumiissusiorneqarsinnaanera pillugu paasissutissat katersorneqartarput.

  Inatsisitigut tunngavik: GDPR art. 6, imm. 1, litra c (inatsisitigut pisussaaffik) takuuk eqqartuussisarnermik inatsimmi kapitali 36).

  Siunertaq: Suliarinninnissaq inatsisitigut peqqussutigineqarpoq, taamaammallu Tusass paasissutissanik taakkuninnga suliarinninnissamut inatsisitigut pisussaaffinnik malinnippoq.

6.   Piffissaq uninngatitsiffiusoq

Tusass paasissutissanik illersuinissamut inatsisitigut tunngavinnik, matumani paasissutissat taamaallaat pisariaqarnera malillugu uninngasuutigineqarnissaat pillugu piumasaqaatinik malinnippoq. Tassa imaappoq siunertap naammassinissaanut pisariaqartumik illit pillutit paasissutissanik taamaallaat aallaaviatigut Tusass uninngasuuteqarsinnaavoq. Taamaattorli inatsit alla pissutigalugu allatut uninngasuuteqarnissaq pisariaqalersinnaavoq.

• Naatsorsuuserineq pillugu inatsimmi malittarisassat³ atuuttut malillugit mobilimut internetsimullu atuisuuffinnut akiliutit suliarineqartarput, matuma kingorna naatsorsuuserinermi atortut ukiup naatsorsuusiorfiusup naanerata tungaanut ukiuni tallimani uninngasuutigineqassapput.

• Illit atuisuuffinnut atatillugu atuisunut sullissivimmi supportimilu suliarinninnermi inuit pillugit paasissutissat ukiuni tallimani uninngasuutigineqassapput

• Suliarinninnissamut akuersineq inatsisitigut tunngaviuvoq, tassa imaappoq akuersinivit utertinnissaata tungaanut imaluunniit Tusassip siunertaminik naammassinninnissaa eqqarsaatigalugu pisariaqarunnaarnissaata tungaanut nittarsaassinermi sulianik, matumani nutaarsiassanik nassiussinissaq siunertaralugu inuit pillugit paasissutissanik uninngatissavai.

• Akiitsut pillugit paasissutissat ukiut qulit kingorna piiarneqassapput

• Attaveqarneq sumiiffillu pillugit paasissutissat - paasissutissaateqarfinnut iserneq pillugu nalunaarut naapertorlugu ukiup ataatsip kingorna piiarneqassapput

7.    Isumannaallisaaneq

Tusassi suliffeqarfittut ”teknikkikkut aaqqissuussaanermilu isumannaallisaarnermi iliuutsinik naleqquttunik atuutilersitsinissamut” akisussaaffeqarpoq. Tamasuma kinguneraa illit pillugit paasissutissat illersorneqarnissaasa qulakkeerneqarnissaannut akisussaaffeqartugut, taamaalilluni inuit avataaneersut nalunaarsuiffitsinnut iserlutik illit pillutit paasissutissanik atornerluisinnaassatik. Tusassimi malitassanik eqqortunik qulakkeerinniffiusartumik immikkoortortaqarfeqarpugut, taamaalilluni tunisassiaatinik sullississutinilluunniit uagutsinni pisiguit illit pillutit paasissutissat paarineqarnissaannik qulakkeerinnissinnaaniassagavit.

Ilaatigut taamaaliortarpugut nalunaarsuiffinni tamani firewallimik, marloqiusamik akuersisarnermik atuisunillu aqutsinermik atuinikkut. Peqatigitillugu inuit pillugit paasissutissanik suliarinnittarnermik IT-millu ataatsimut isigalugu isumannaallissaanrnermik Tusassimi sulisut ilinniartinneqartarput.

8.   Illit pisinnaatitaaffitit

Paasissutissanik illersuineq pillugu peqqussut malillugu Tusassip paasissutissanik ilinnut tunngasunik suliarinninneranut atatillugu assigiinngitsunik pisinnaatitaaffeqarputit.

Pisinnaatitaaffinnik atuerusukkuit uunga attavigissavatsigut: Privacy@tusass.gl

Paasitinneqarsinnaatitaaneq (paasisaqarnissamut pisinnaatitaaffik)
Tusass illit pillutit paasissutissanik sunik katersisimanera sunillu suliaqarnera pillugit paasitinneqarsinnaatitaavutit.

Naqqiuteqarsinnaatitaaneq (naqqiineq)
Illit pillutit paasissutissat eqqunngippata aaqqinneqarnissaannik pisinnaatitaaffeqarputit.

Piiaasinnaatitaaneq
Nalinginnaasumik Tusassip piffissami paasissutissanik piiaasarnerata iluani illit pillutit paasissutissat piiarneqarnissaannik pisut ilaanni pisinnaatitaaffeqarputit. Tassa ilaatigut akuersinerit inatsisitigut tunngaviuppat, aamma akuersissut utertikkukku imaluunniit immikkut pissutissaqaruit tamanna atuuppoq.

Suliarinninnerup killilerneqarnissaanik pisinnaatitaaffeqarneq
Pisut ilaanni illit pillutit paasissutissat killilimmik atorneqarnissaannut pisinnaatitaaffeqarputit. Killilimmik atorneqarnissaannut pisinnaatitaaffeqaruit, uninngasuuteqarnissamut akuersisimaguit, inatsisit tunngavigalugit piumasaqaatinik aalajangersaanissaq, atuutsitsinissaq illersuinissarluunniit anguniarlugu imaluunniit inummik inuiaqatigiinniluunniit soqutigisanik pingaarutilinnik illersuinissaq eqqaassanngikkaanni maannamiit Tusass taamaallaat paasissutissanik suliarinnissinnaavoq.

Naammagittaalliorsinnaatitaaneq
Tusassip illit pillutit paasissutissanik suliaqarnera inatsisitigut unioqqutitsinerunngikkaluartoq pisut ilaani Tusassimut naammagittaalliornissamut pisinnaatitaaffeqarputit. Aamma illit pillutit paasissutissat toqqaannartumik nittarsaassinermut atorneqarnerat pillugu naammagittaalliuuteqarsinnaavutit.

Paasissutissat nuunneqarsinnaatitaanerat (dataportabilitet)
Illit pillutit paasissutissat aaqqissuussaasumik, nalinginnaasumik atorneqartartut atorlugit aamma maskiinap atuarsinnaasaanik akornuteqanngitsumik tigusaqarnissamut kiisalu inuit pillugit paasissutissat taakku paasissutissanut akisussaasumiit allamut nuussinissamut pisut ilaanni pisinnaatitaaffeqarputit.

Nalunaarsorneqarsimasut pisinnaatitaaffii pillugit paasissutissanut nakkutilliisoqarfiup ilitsersuutaani pisinnaatitaaffitit pillugit paasisaqarnerusinnaavutit, taakku datatilsynet.dk-mi nassaarisinnaavatit.

Inuit pillugit paasissutissanut politikkimik nutarterineq
Tusassip illit pillutit paasissutissanik suliarinninnerani arlaannik allannguuteqaruni inuit pillugit paasissutissanut politikki una nutartissavaa. Tusassip nittartagaani Inuit pillugit paasissutissanut politikki qaqugukkulluunniit atuuttoq atuarneqarsinnaavoq.

9.   Tigusisut

Pisut ilaanni suleqatigisartakkat pilersuisullu avataaneersut, matumani hostingimut, akiligassalerinermut, atuisunik sullissinermut tunngatillugu aamma IT-mi sullissisut Tusassimit atorneqartarput. Paasissutissanik suliarinnittoq Tusass sinnerlugu aamma Tusassip ilitsersuutai taamaallaat malillugit inuit pillugit paasissutissanik suliaqassaaq. Naleqquttumik uppernarsarneqarsinnaasumik isumannaallisaanermi qularnaveeqqutillit aamma GDPR-ip ataani paasissutissanik illersuinissamut inatsisitigut malittarisassanik aamma Kalaallit Nunaanni paasissutissat pillugit inatsimmik atuuttumik malinnittut taamaallaat Tusassimit atorneqartarput.

Pisut ilaanni Tusassip illit pillutit paasissutissat suleqatigisartakkanut allanut, paasissutissanik suliarinnittunuunngitsoq ingerlateqqissinnaavai. Pisortani oqartussat inatsisitigut piumasaqaatigineqarpat imaluunniit isumaqatigiissut eqqortinniarlugu suleqatigisartakkat allat paasissutissanik nassinneqarsinnaapput, tamannali pillugu inuk pineqartoq ilisimatinneqassaaq.

10.   Paasissutissanik nunanut allanut nuussineq

Tusassip taamaallaat EU/EØS-ip iluani paasissutissanik suliaqarnissani anguniartarpaa. Inuit pillugit paasissutissat nunanut allanut nuunneqassappata paasissutissanik illersuineq pillugu peqqussummi kapitali V malillugu paasissutissanik suliarinnittarneq pillugu isumaqatigiissuteqarnissaq aamma atuuttumik nuussinissamut tunngaveqarnissaq Tusassimit qulakkeerneqartarput.

Inatsisitigut tunngavik: naammattumik paasissutissanik illersuisoqarnera pillugu EU-kommissionip aalajangiinera tunngavigalugu paasissutissanik illersuineq pillugu peqqussummi artikeli 45, imm.1 naapertorlugu nuussisoqarsinnaavoq. Nuna, sumiiffik ingerlataqarfilluunniit alla pineqartoq naammattumik illersuinngitsoq nalilerneqarpat nuussinissaq sioqqullugu aalajangersakkamik allamik tunngavissaqarnissaq Tusassimit qulakkeerneqaqqaartarpoq. Nalinginnaasumik nuussinissaq sioqqullugu paasissutissanut akisussaasup (Tusass) aamma paasissutissanik suliaqartup akornanni pisariaqartumik qularnaveeqquteqartoqarnissaa - paasissutissanik illersuineq pillugu peqqussummi artikeli 46, imm. 2, litra c-mi - piumasaqaatigineqarpoq. Tamatuma kingunerisaanik naammattumik isumannaallisaasoqassaaq, nalunaarsorneqartup pisinnaatitaaffini atorsinnaavai aamma eqqartuussinermi atorneqarsinnaanissaa periarfissaassaaq.

11.   Paasissutissanik nakkutilliisoqarfimmut naammagittaalliorneq

Tusassip illit pillutit paasissutissanik suliarinninnera naammagisimaanngikkukku paasissutissanik nakkutilliisoqarfimmut naammagittaalliorsinnaatitaavutit..

www.datatilsynet.dk

Carl Jacobsens Vej 35
2500 Valby

Tlf. 33 19 32 00
dt@datatilsynet.dk

1. Inuit pillugit paasissutissanik suliaqarnermut atatillugu inunnik illersuineq pillugu aamma paasissutissanik taakkuninnga paarlaasseqatigiissinnaaneq aamma malitassamik 95/46/EF-imik (paasissutissanik illersuineq pillugu peqqussut nalinginnaasoq) (2016/69) atorunnaarsitsineq pillugu Europami Parlamentip aamma Siunnersuisoqatigit peqqussutaat (2016/679) 17. april 2016-immersoq

2. Inuit pillugit paasissutissanik suliaqarneq pillugu peqqussut Kalaallit Nunaannut atuutilersinneqartoq nr. 1238

3. Naatsorsuuserineq pillugu natsimmi kunngip peqqussutaatigut Kalaallit Nunaannut atuutilersinneqartumi nr. 624, 23. juuni 2008-meersumi § 10